ក្លឹបយក្សនៅក្របខណ្ឌ Serie A ក្លឹប Inter Milan បានបង្វែរការចាប់អារម្មណ៍ក្នុងការចុះហត្ថលេខាលើខ្សែការពារកណ្តាលរបស់ក្រុម Manchester United កីឡាករ Harry Maguire  បន្ទាប់ពីខកចិត្តក្នុងការចុះហត្ថលេខាលើខ្សែការពារសញ្ជាតិស៊ុយអែតគឺកីឡាករ Victor Lindelof ។



ខ្សែការពាររបស់ជម្រើសជាតិអង់គ្លេសតរូបនេះ  ស្ថិតនៅក្នុងកៅអីបម្រុង  ក្រោមការដឹកនាំដោយអ្នកចាត់ការទូទៅលោក  Erik ten Hag ក្នុងរដូវកាលនេះ ទោះបីជា Maguire បង្ហាញទម្រង់លេងបានយ៉ាងល្អសម្រាប់ក្រុមជម្រើសជាតិអង់គ្លេសក៏ដោយ  ក្នុងព្រឹត្តិការណ៏ World Cup 2022 នៅកាតា។



ដោយហេតុផលនេះហើយ​ទើប Inter មានបំណងធ្វើការដេញថ្លៃដណ្តើមយក Maguire មកចូលរួមជាមួយក្រុម  បន្ទាប់ពីបិសាចក្រហម Manchester United  បានបដិសេធមិនព្រមដោះលែង Lindelof  ដោយក្រុម Inter នឹងផ្តល់សំណើរក្នុងលក្ខខណ្ឌខ្ចីជើងរហូតដល់ចុងបញ្ចប់នៃរដូវកាលនេះ។



យ៉ាង​ណា​ក៏​ដោយ ខ្សែ​ការពារ​វ័យ ២៩ ឆ្នាំ​រូប​នេះ​នៅ​តែ​ចង់រួមរស់ជាមួយក្លិប ​ Manchester United  រហូតដល់រដូវក្តៅ  ដើម្បីសម្រេចចិត្តលើអនាគតខ្លួនឯង  ជាមួយនឹងសារព័ត៌មាន «Daily Mail» ដែលជាប្រព័ន្ធផ្សព្វផ្សាយដ៏ល្បីល្បាញក្នុងប្រទេសអង់គ្លេស បានរាយការណ៍ថា Maguire បានត្រៀមខ្លួនរួចជាស្រេចដើម្បីរង់ចាំឱកាសរបស់គាត់ ប្រសិនបើខ្សែការពារ Man United  រូបណាមានបញ្ហារបួស ឬជាប់បម្រាម។