ក្លិបកាំភ្លើងធំ Arsenal កំពុងតែបង្ហាញចំណាប់អារម្មណ៍ចង់បានតារាឆ្នើមរបស់ក្រុមជម្រើសជាតិជប៉ុន Kaoru Mitoma មកពង្រឹងក្រុមយ៉ាងខ្លាំង  ដោយលោក Fabrizio Romano ដែលជាអ្នករាយការណ៍ព័ត៌មានដ៏ល្បីមួយរូប បានបញ្ជាក់ថា Arsenal  ចង់ឱ្យកីឡាកររូបនេះទៅចូលរួមក្រុម  ព្រោះ​វា​នឹង​ជួយ​ឲ្យប្រព្ធន័​វាយ​បក​របស់​ក្រុម​ឲ្យ​កាន់​តែ​ល្អ​ឥត​ខ្ចោះ។



តារាឆ្នើមរបស់ក្រុមជម្រើសជាតិជប៉ុនវ័យ 25 ឆ្នាំរូបនេះ  បាននិងកំពុងបង្កើតលទ្ធផលដ៏ល្អនៅក្នុងក្របខ័ណ្ឌ English Premier League ចាប់តាំងពីបានផ្ទេរពីក្លិប Kawasaki Frontale ដែលជាក្លឹបកំពូលនៅក្នុងសមរភូមិ J-League ។ សម្រាប់Mitoma ចូលរួមជាមួយក្លិប Brighton ក្នុងឆ្នាំ 2021 ជាមួយនឹងតម្លៃត្រឹមតែ 2.7 លានផោនតែប៉ុណ្ណោះ។



សូម្បីតែកាលពីរដូវកាលមុន Mitoma ត្រូវបានខ្ចីជើងដោយក្រុមពីលីគបែលហ្ស៊ិក Union Saint-Gallois  ប៉ុន្តែក្នុងរដូវកាលនេះ កីឡាកររូបនេះបានក្លាយជាកីឡាករសំខាន់ម្នាក់សម្រាប់ Brighton  ហើយបានបង្ហាញទម្រង់លេងយ៉ាងល្អ ដោយស៊ុតបញ្ចូលទីបាន 7 គ្រាប់ និង assists 2 ដងក្នុង 20 ប្រកួត។



ទោះបីជាយ៉ាងណាក៏ដោយ ជាមួយនឹងកិច្ចសន្យាបច្ចុប្បន្នរបស់ Mitoma បន្តនៅ Brighton រហូតដល់ឆ្នាំ 2025  ដោយអ្នកចាត់ការក្រុមលោក  Roberto De Zerbi ចង់​រក្សា​កីឡាករ​ដ៏​សំខាន់​រូប​នេះ​នៅ​ជាមួយ​ក្រុម​។