ខ្សែប្រយុទ្ធសញ្ជាតិសេណេហ្គាល់កីឡាករ  Sadio Mané  មិនអាចទៅលេង  World Cup នៅប្រទេសកាតា ជាមួយក្រុមជម្រើសជាតិសេណេហ្គាល់នោះទេ​ ព្រោះ​របួស​តម្រូវ​ឱ្យ​វះកាត់​ជា​បន្ទាន់
។ កីឡាករវ័យ 30 ឆ្នាំរូបនេះបានរងរបួសសរសៃពួរនៅនាទីទី12 មិនអាចបន្តលេងបានទៀត ហើយត្រូវប្តូរចេញនៅនាទីទី20 ក្នុងក្របខ័ណ្ឌ  Bundesliga នៅក្នុងការប្រកួតរបស់ក្រុម  Bayern Munich ដែលបានយកឈ្នះក្រុម  Werder Bremen ក្នុងលទ្ធផល 6-1 នៅ  Allianz Arena។



ទោះបីជាមានបញ្ហារបួសក៏ដោយ  Mane ត្រូវបានគេដាក់ឈ្មោះក្នុងក្រុមជម្រើសជាតិសេណេហ្គាល់សម្រាប់ការប្រកួត  World Cup ប៉ុន្តែអតីតខ្សែប្រយុទ្ធ  Liverpool រូបនេះនឹងមិនមានវត្តមាននៅក្នុងប្រទេសកាតាឡើយ ព្រោះមិនអាចជាសះស្បើយពីរបួសទាន់។



សេចក្តីថ្លែងការណ៍របស់ម្ចាស់ជើងឯកអាល្លឺម៉ង់  Bayern Munich ​បាននិយាយថា៖  " Sadio Mane បានទទួលការវះកាត់ដោយជោគជ័យនៅទីក្រុង  Innsbruck នៅក្នុងប្រទេសអូទ្រីស ដោយសាស្រ្តាចារ្យ Christian Fink និងវេជ្ជបណ្ឌិត  Andy Williams មកពីទីក្រុងឡុងដ៍កាលពីល្ងាចថ្ងៃព្រហស្បតិ៍”។

ក្លិបបានបន្ថែមទៀតថា៖ “ ក្នុងអំឡុងពេលវះកាត់ សរសៃពួរមួយត្រូវបានភ្ជាប់ទៅសរសៃក្បាលខាងស្តាំរបស់គាត់។ ដូច្នេះហើយខ្សែប្រយុទ្ធ  Bayern នឹងមិនអាចលេងឱ្យក្រុមជម្រើសជាតិសេណេហ្គាល់ក្នុងព្រឹត្តិការណ៍  World Cupបានឡើយ ហើយនឹងចាប់ផ្តើមសម្រាកព្យាបាលនៅទីក្រុង  Munich ក្នុងប៉ុន្មានថ្ងៃខាងមុខនេះ”។



សម្រាប់ក្រុមជម្រើសជាតិសេណេហ្គាល់ ត្រូវជួបជាមួយហូឡង់ក្នុងការប្រកួតដំបូងក្នុងពូល A នៅថ្ងៃចន្ទ បន្ទាប់មកប្រកួតជាមួយម្ចាស់ផ្ទះកាតា និងអេក្វាឌ័រ។