អតីតខ្សែប្រយុទ្ធអង់គ្លេសលោក  Chris Sutton  បានលើកឡើងពីការយល់ឃើញរបស់គាត់ថាក្រុមជម្រើសជាតិព័រទុយហ្គាល់អាចទទួលរងនូវលទ្ធផលមិនល្អ ប្រសិនបើពួកគេប្រើប្រាស់កីឡាករ  Cristiano Ronaldo  ក្នុងជម្រើសដំបូង  នៅវគ្គ 16 ចុងក្រោយក្នុងការប្រកួតពានរង្វាន់  World Cup 2022  របស់ពួកគេទល់នឹងក្រុមជម្រើសជាតិស្វីស ដែលការប្រកួតនឹងចាប់នៅថ្ងៃអង្គារ ទី៦  ខែធ្នូ វេលាម៉ោង ២ ទាលភ្លីខាងមុខនេះ។



ទោះបីជា  Ronaldo ជាកីឡាករល្អបំផុតម្នាក់ក្នុងពិភពបាល់ទាត់ប៉ុន្មានឆ្នាំមកនេះក៏ដោយ។  ប៉ុន្តែ​រដូវ​កាល​នេះទម្រង់​លេង​របស់​គេ​បាន​ធ្លាក់​ចុះ​យ៉ាង​ច្បាស់ ស្របពេលដែលនៅក្នុងព្រឹត្តិការណ៏  FIFA  world cup 2022 នេះ​ គាត់​រក​បាន​តែ​មួយ​គ្រាប់​ប៉ុណ្ណោះ នោះជាបាល់ប៉េណាល់ទីទល់នឹងក្រុមជម្រើសជាតិហ្គាណាទៅទៀត។



អតីតខ្សែប្រយុទ្ធរបស់ក្លិប Blackburn Rovers ដែលបានឈ្នះរដូវកាល Premier League ឆ្នាំ 1994-95 ដែលជាអ្នកអធិប្បាយជួរមុខរបស់ BBC បានយល់ឃើញថា៖ “ក្រុមជម្រើសជាតិព័រទុយហ្គាល់មានកីឡាករដ៏អស្ចារ្យជាច្រើន ប៉ុន្តែកីឡាករស្វីសមានទំនុកចិត្តខ្ពស់ណាស់។ បន្ទាប់​ពី​ពួក​គេ​បាន​យក​ឈ្នះ​លើ​ក្រុមជម្រើសជាតិស៊ែប៊ីរហូត​ដល់​ពួក​គេ​បាន​ឡើង​ទៅកាន់​វគ្គ 16 ក្រុម​ចុង​ក្រោយ។ លើសពីនេះ កាលពីខែមិថុនា ពួកគេបានយកឈ្នះ ព័រទុយហ្គាល់ ក្នុងការប្រកួតពានរង្វាន់ Nations League”។


គាត់បានបន្ថែមទៀតថា ៖  “ការប្រកួតនេះ​នឹង​ក្លាយ​ជា​ការ​ប្រកួតមួយ​ដ៏​អស្ចារ្យ។ ហើយខ្ញុំមានអារម្មណ៍ថា  Cristiano Ronaldo  នឹងរួមចំណែកជួយក្រុមជម្រើសជាតិរបស់គាត់។ ប៉ុន្តែ​អវិជ្ជមាន​ច្រើនជាង​វិជ្ជមានសម្រាប់​ព័រទុយហ្គាល់។​ ប្រសិនបើ​ព័រទុយហ្គាល់​ប្រើប្រាស់កីឡាករ  Ronaldo នោះ​វា​នឹង​មាន​ហានិភ័យ​ខ្លាំង​ណាស់”។