សមាគមបាល់ទាត់អង់គ្លេស (FA)   នឹងធ្វើអ្វីគ្រប់យ៉ាងដែលពួកគេអាចធ្វើបាន ដើម្បីបញ្ចុះបញ្ចូលលោក Gareth Southgate  ឱ្យបន្តធ្វើជាគ្រូបង្វឹកក្រុមជម្រើសជាតិអង់គ្លេសបន្តទៀត   នេះបើយោងតាមសារព័ត៌មាន Daily Mail ។



សម្រាប់កុងត្រារបស់លោក Southgate  ជាមួយអង់គ្លេសនឹងផុតកំណត់នៅចុងឆ្នាំ 2024 ​ ប៉ុន្តែ FA  មានបំណងរក្សាគាត់ដល់ Euro 2024។  បន្ទាប់ពីបរាជ័យក្នុងការនាំក្រុមទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup 2022 ចុងក្រោយនេះ   លោក Southgate ហាក់បីដូចជាស្រពេចស្រពិលអំពីអនាគតរបស់គាត់ បើទោះបីជានៅសល់កុងត្រាប្រហែល 2 ឆ្នាំក៏ដោយ។ 



កាសែត Daily Mail   បានបន្ថែមថាលោក  John McDermott  ប្រធានបច្ចេកទេសរបស់ FA  នឹងក្លាយជាតួអង្គសំខាន់ក្នុងការពិភាក្សាជាមួយលោក Southgate  ដោយអ្នកទាំងពីរមានទំនាក់ទំនងល្អជាមួយគ្នា  ។

ដោយសមាគមបាល់ទាត់អង់គ្លេស (FA)  ​​មិនមានផែនការច្បាស់លាស់ថាតើអ្នកណានឹងគ្រប់គ្រងក្រុមជម្រើសជាតិអង់គ្លេស ប្រសិនបើលោក  Southgate សម្រេចចិត្តលាលែងពីតំណែង។ វាត្រូវបានគេនិយាយថាមនុស្សជាច្រើននៃ FA  ពេញចិត្តនឹងលោក Brendan Rodgers ដែលជាអ្នកចាត់ការទូទៅរបស់ក្លិប  Leicester City  ប៉ុន្តែ Rodgers  គឺជាជនជាតិអៀរឡង់ខាងជើង ដោយមានអ្នកផ្សេងទៀតដែលចង់បានអ្នកគ្រប់គ្រងជាជនជាតិអង់គ្លេសផ្ទាល់តែម្តង។



ស្របពេលជាមួយគ្នានេះដែរ គេជឿថាលោក  Mauricio Pochettino និងលោក  Thomas Tuchel  ដែលជាអ្នកគ្រប់គ្រងដ៏ល្បីល្បាញ ក៏ចាប់អារម្មណ៍ចង់ក្លាយជាគ្រូបង្វឹកក្រុមជើងឯកបាល់ទាត់ពិភពលោកមួយសម័យនេះដែរ ប៉ុន្តែនេះមិនទាន់ដឹងច្បាស់នៅឡើយទេថា  FA នឹងពិចារណាជួលអ្នកគ្រប់គ្រងបរទេសឬអត់។