ក្រោយពីព្រឹត្តិការណ៍ FIFA World Cup Qatar 2022 បានឈានមកដល់វគ្គផ្ដាច់ព្រ័ត្រនៅរាត្រីនេះហើយនោះ។  នៅថ្ងៃនេះ GPS Score បានប្រមូលផ្ដុំកីឡាករទាំង 10 រូបដែលបានបង្ហាញភាពលេចធ្លោជាខ្លាំងនៅក្នុងពានរង្វាន់ FIFA World Cup 2022 នេះ ហើយនឹងមានឱកាសខ្ពស់ក្នុងការក្លាយជាកីឡាករដែលមានតម្លៃផ្ទេរថ្លៃៗ ក្នុងអំឡុងពេលទីផ្សារដោះដូរកីឡាករខែមករាខាងមុខនេះបើក។

វាជារឿងធម្មតាទេសម្រាប់រាល់ការប្រកួតបាល់ទាត់ពិភពលោកម្ដងៗ ដែលមានកីឡាករដែលលេចធ្លោ និងក្លាយជាតារាឆ្នើមថ្មីក្រោយពីបញ្ចប់ព្រឹត្តិការណ៍។  ដូចគ្នានឹងការប្រកួតបាល់ទាត់ពិភពលោកឆ្នាំ 2022 ដែលមានកីឡាករជាច្រើនធ្វើបានលទ្ធផលដ៏អស្ចារ្យ។  ហើយគ្រប់គ្នាជឿថាតម្លៃខ្លួនរបស់ពួកគេនឹងឡើងខ្ពស់ជាមិនខាន។

ហើយខាងក្រោមនេះគឺជាកីឡាករដែលមានទម្រង់លេងល្អទាំង 10 រូបដែលនឹងមានឱកាសខ្ពស់ក្នុងការផ្លាស់ទៅកាន់ក្លឹបធំៗ ដើម្បីចូលរួមក្នុងអំឡុងពេលទីផ្សារកីឡាករខែមករាខាងមុខនេះបើក៖

▪️ ខ្សែបម្រើ Sofyan Amrabat (របស់ម៉ារ៉ុក)

Amrabat មានកុងត្រាជាមួយក្រុម Fiorentina រហូតដល់ឆ្នាំ 2024 ជាមួយនឹងជម្រើសបន្ថែមរយៈពេល 1 ឆ្នាំទៀត។

ទោះជាយ៉ាងណាក៏ដោយភ្នាក់ងាររបស់ Amrabat បានសារភាពថាមានការចាប់អារម្មណ៍ពីក្លឹបធំៗមួយចំនួនក្នុងអំឡុង World Cup នេះ។  ហើយនេះក៏មិនមែនជារឿងភ្ញាក់ផ្អើលអ្វីនោះដែលព្រោះ Amrabat គឺជាខ្សែបម្រើការពារដ៏ល្អបំផុតម្នាក់នៅ World Cup 2022 ដែលបានជួយអោយម៉ារ៉ុកឡើងទៅដល់វគ្គពាក់កណ្ដាលផ្ដាច់ព្រ័ត្រយ៉ាងគួរភ្ញាក់ផ្អើលបំផុត។

▪️ ខ្សែប្រយុទ្ធស្លាប Ritsu Doan (របស់ជប៉ុន)

World Cup 2022 ជប៉ុនគឺជាក្រុមដ៏អស្ចារ្យមួយដោយអាចយកអាល្លឺម៉ង់ នឹងអេស្ប៉ាញជាមួយនឹងការឈរក្នុងចំណាត់ថ្នាក់លេខ 1 នៅក្នុងពូលនៃវគ្គចែកពូលផងដែរ។  ហើយកីឡាករដ៏ឆ្នើមម្នាក់របស់ជប៉ុនគឺ Ritsu Doan ដែលអាចស៊ុតចូលអាល្លឺម៉ង់ 1 គ្រាប់នឹងអេស្ប៉ាញ 1 គ្រាប់។

Ritsu Doan ដែលបច្ចុប្បន្នមានវ័យ 24 ឆ្នាំទើបតែបានផ្លាស់ទៅចូលរួមជាមួយក្រុម Freiburg ពី PSV នៅដើមនៃរដូវកាលនេះទេ។  ប៉ុន្តែមានសេចក្តីរាយការណ៍ថាទាំង Roma និង Manchester City បានកំពុងតែចាប់អារម្មណ៍លើកីឡាកររូបនេះ។

▪️ ខ្សែបម្រើ Enzo Fernandez (របស់អាហ្សង់ទីន)

Enzo Fernandez គឺជាខ្សែបម្រើការពារដ៏ឆ្នើមម្នាក់របស់អាហ្សង់ទីននៅ World Cup 2022 ជាពិសេសទល់នឹងម៉ិកស៊ិក និងក្រូអាតតែម្ដង។

តារារបស់ក្រុម Benfica លេងបានយ៉ាងល្អជាមួយនឹងទេពកោសល្យមិនគួរឱ្យជឿរបស់គេ។  ហើយរូបគេក៏កំពុងតែទទួលបានការចាប់អារម្មណ៍ពីសំណាក់ក្រុមធំៗដូចជា Liverpool , Manchester City នឹង Real Madrid ផងដែរ។

▪️ ខ្សែប្រយុទ្ធ Cody Gakpo (របស់ហូឡង់)

Cody Gakpo បានបង្ហាញទម្រង់លេងបានយ៉ាងល្អនៅក្នុងពានរង្វាន់ FIFA World Cup 2022 នេះ ដោយអាចរកបាន 3 គ្រាប់អោយហូឡង់។

Manchester United និង Arsenal គឺជាក្រុមដែលបានបង្ហាញយ៉ាងច្បាស់ពីបំណងចង់នាំយកកីឡាករវ័យក្មេងរូបនេះទៅចូលរួមជាមួយពួកគេ ខណៈដែល PSV ត្រៀមខ្លួនរួចជាស្រេចក្នុងការទទួលយកសំណើរប្រសិនបើតម្លៃត្រូវចិត្ត។

▪️ ខ្សែការពារកណ្ដាល Joško Gvardiol (របស់ក្រូអាត)

វ័យត្រឹម 20 ឆ្នាំ Joško Gvardiol បានដើរតួនាទីយ៉ាងសំខាន់នៅក្នុងក្រុមជម្រើសជាតិក្រូអាតនៅ World Cup 2022 នេះ នឹងបាននាំក្រូអាតឡើងទៅដល់វគ្គពាក់កណ្ដាលផ្ដាច់ព្រ័ត្រផងដែរ។  ហើយតម្លៃខ្លួនរបស់ខ្សែការពារកណ្ដាលវ័យក្មេងរូបនេះ ក៏កំពុងតែឡើងខ្ពស់ខ្លាំងផងដែលក្រោយពីធ្វើបានយ៉ាងល្អនៅ World Cup 2022 នេះ។

▪️ ខ្សែប្រយុទ្ធស្លាប Mohammed Kudus (របស់ហ្គាណា)

Everton បានព្យាយាមចុះហត្ថលេខាលើ Mohamed Kudus កាលពីរដូវក្តៅ ប៉ុន្តែមិនបានសម្រេច។  ហើយក្នុងអំឡុងទីផ្សារដោះដូរកីឡាករខែមករាខាងមុខនេះបើក ប្រាកដជាពិបាកជាងពេលមុនទៅទៀត ដោយសារតែ Kudus ធ្វើបានយ៉ាងល្អនៅក្នុងការប្រកួតពានរង្វាន់ World Cup 2022។

ក្រៅពីស៊ុតបញ្ចូលទីបាន ​​2 គ្រាប់នៅ World Cup 2022 Kudus ក៏បានបង្ហាញពីជំនាញគ្រប់គ្រងបាល់ដ៏ល្អ ជាមួយនឹងការអូសទាញ និងកលល្បិចរបស់គេ។  ច្បាស់ណាស់ថាក្រុមណាដែលចង់បានកីឡាកររូបនេះពី Ajax គឺត្រូវតែចំណាយក្នុងទំហំទឹកប្រាក់ច្រើន។

▪️ អ្នកចាំទី Dominik Livakovic (របស់ក្រូអាត)

Dominik Livakovic គឺជាអ្នកចាំទីដ៏ល្អបំផុតម្នាក់នៅក្នុងការប្រកួតបាល់ទាត់ពិភពលោកឆ្នាំ 2022 នេះ ដោយអាចធ្វើការសង្គ្រោះបាល់បាន 24 លើកអោយក្រូអាតទទួលបានចំណាត់ថ្នាក់លេខ 3។

ក្នុង​ការ​ប្រកួត​ជាមួយ​ជប៉ុន​ក្នុង​វគ្គ​ 16 ​ក្រុម​ចុង​ក្រោយ Livakovic បាន​សង្គ្រោះ​បាល់​ប៉េណាល់ទី​ចំនួន​​ 3 ដង។  ក្នុងនោះផងដែលភ្នាក់ងាររបស់ Livakovic ត្រៀមខ្លួនជាស្រេចដើម្បីទទួលយកការផ្តល់ជូនជាច្រើននៅក្នុងខែមករាខាងមុខនេះ ខណៈដែល Bayern Munich ចង់បានអ្នកចាំទីរូបនេះ យកទៅជំនួស Manuel Neuer ដែលមានបញ្ហារបួស។

▪️ ខ្សែបម្រើ Azzedine Ounahi (របស់ម៉ារ៉ុក)

Ounahi គឺជាខ្សែបម្រើដ៏ល្អបំផុតម្នាក់របស់ម៉ារ៉ុកនៅក្នុងពានរង្វាន់ FIFA World Cup 2022 នេះ។  កីឡាករវ័យ 22 ឆ្នាំដែលមកពីក្រុម Angers រូបនេះពិតជាខ្សែបម្រើដែលមានភាពរស់រវើកមែនទែននៅតំបន់កណ្ដាលរបស់ម៉ារ៉ុក ដែលជាហេតុធ្វើអោយម៉ារ៉ុកអាចឡើងទៅដល់វគ្គពាក់កណ្ដាលផ្ដាច់ព្រ័ត្រ World Cup យ៉ាងអស្ចារ្យបំផុត។

▪️ ខ្សែប្រយុទ្ធ Gonçalo Ramos (របស់ព័រទុយហ្គាល់)

ឈ្មោះរបស់ Gonçalo Ramos បានទាក់ទាញការចាប់អារម្មណ៍ពេញពិភពលោកមែនទែន បន្ទាប់ពីរូបគេបានរុញ Cristiano Ronaldo អោយធ្លាក់ទៅជាកីឡាករបម្រុង។  ក្រោយពីរូបគេស៊ុតបញ្ចូលទីបាន 3 គ្រាប់ក្នុងការប្រកួតទល់នឹង​ស្វីស នឹងបានក្លាយជាកីឡាករតែម្នាក់គត់ដែលធ្វើបានគ្រាប់បាល់ hat-trick នៅ World Cup 2022 នេះ។

Benfica ទទូចថាពួកគេមិនប្រញាប់ប្រញាល់លក់កីឡាករវ័យ 21 ឆ្នាំរូបនេះចេញនោះទេ ប៉ុន្តែក្លឹបនឹងពិចារណាឡើងវិញ ប្រសិនបើមានការផ្ដល់ជូនដ៏ល្អណាមួយកើតឡើង។

▪️ ខ្សែការពារកណ្ដាល Harry Suttar (របស់អូស្ត្រាលី)

កីឡាករអូស្ត្រាលីមួយចំនួនពិតជាធ្វើបានយ៉ាងល្អនៅក្នុងការប្រកួតបាល់ទាត់ពិភពលោក 2022 នេះ។  ប៉ុន្តែគ្មាននរណាម្នាក់លេចធ្លោជាង Harry Zuttar នោះទេ។

ខ្សែការពារកណ្ដាលដែលមកពីក្រុម Stoke City ស្ទើរតែផ្លាស់ទៅ Everton ទៅហើយកាលពីឆ្នាំមុន ប៉ុន្តែរូបគេក៏បានជួបបញ្ហារបួសដែលធ្វើអោយគ្រប់យ៉ាងបានផ្លាស់ប្ដូរ ទោះជាយ៉ាងនេះក្តី ទីផ្សារដោះដូរកីឡាករខែមករាខាងមុខនេះបើក រូបគេប្រាកដជាទទួលបានឱកាសផ្លាស់សារជាថ្មីម្តងទៀត។