ក្រុមតោខៀវ Chelsea គ្រោងនឹងបញ្ចប់កិច្ចសន្យារបស់ខ្សែប្រយុទ្ធ Pierre-Emerick Aubameyang បន្ទាប់ពីកីឡាកររូបនេះបានបង្ហាញមុខចូលទស្សនាការប្រកួត El Clasico ហើយត្រូវបានគេរាយការណ៍ថាសុខចិត្តកាត់បន្ថយប្រាក់ឈ្នួលដើម្បីត្រលប់ទៅ Camp Nou វិញ។



Chelsea អាចនឹងបញ្ចប់កិច្ចសន្យារបស់ Pierre-Emerick Aubameyang បន្ទាប់ពីកីឡាកររូបនេះបានចូលរួមទស្សនាការប្រកួត El Clasico ក្នុងការប្រកួតដែល Barcelona បានយកឈ្នះ Real Madrid ២-១ កាលពីថ្ងៃអាទិត្យនិងបង្ហាញពីបំណងចង់ត្រលប់ទៅក្លឹប Barca វិញ នេះបើយោងតាម ​​SPORT ។ 




ក្រោយ​ចប់​ការ​ប្រកួត ខ្សែ​ប្រយុទ្ធ​អន្តរជាតិ​ហ្គាបុង​រូបនេះ ត្រូវ​បាន​គេ​រាយការណ៍​ថា​បាន​ចូល​ទៅ​ក្នុង​បន្ទប់​ផ្លាស់​ប្តូរ​របស់ Barça ហើយ​បាន​បង្ហាញ​ពី​បំណង​ចង់​ត្រឡប់​ទៅ​លេង​ក្នុង​ទឹកដី Camp Nou វិញ  សូម្បីតែត្រូវកាត់បន្ថយប្រាក់ឈ្នួលក៏ដោយ បន្ទាប់​ពី​មានការខក​ចិត្ត​ក្នុង​ទឹកដី Stamford Bridge។

Aubameyang ត្រឡប់​មក​លេង​នៅ Premier League វិញ  ដោយសង្ឃឹមថានឹងបានធ្វើការជាមួយអតីតគ្រូបង្វឹករបស់គាត់គឺលោក Thomas Tuchel កាលនៅ Borussia Dortmund មុនពេលដែលគ្រូបង្វឹកសញ្ជាតិអាឡឺម៉ង់រូបនេះត្រូវបានបណ្តេញចេញ ដោយសារតែការខ្វែងគំនិតជាមួយម្ចាស់ថ្មី Todd Bohley ។



ពីស្ថានភាពបែបនេះ ធ្វើឱ្យ Chelsea ត្រៀមខ្លួនរួចជាស្រេចក្នុងការបញ្ចប់កិច្ចសន្យាជាមួយគាត់មុនកំណត់ ដើម្បីបើកផ្លូវឱ្យ Aubameyang  ផ្លាស់ប្តូរក្រុមដោយសេរី ដោយសារតែខាង Chelsea វាមិនមានអារម្មណ៍ថា  Aubameyang នឹងស្ថិតនៅក្នុងផែនការក្រុមរបស់លោក Graham Potter នោះទេ។ Aubameyang មានទម្រង់លេងគួរឱ្យចាប់អារម្មណ៍សម្រាប់ Barca ដោយស៊ុតបញ្ចូលទីបាន 13 គ្រាប់ក្នុង 23 ប្រកួត។