ខ្សែការពារ Raphael Varane របស់ក្លិប Manchester United បានប្រកាសចូលនិវត្តន៍ពីក្រុមជម្រើសជាតិបារាំង   ជាផ្លូវការហើយ  កាលពីថ្ងៃ​ព្រហស្បតិ៍ ទី​២ ខែ​កុម្ភៈ  បើ​ទោះ​បីជា​កីឡាកររូបនេះ មាន​អាយុ​ទើបតែ ២៩​ឆ្នាំ​ក៏​ដោយ។



សម្រាប់ Varane ត្រូវបានកោះហៅចូលក្រុមជម្រើសជាតិជាលើកដំបូងក្នុងឆ្នាំ 2013 ដោយលេងបាន 93 ប្រកួតសម្រាប់ប្រទេសរបស់គាត់ នឹងស៊ុតបញ្ចូលទីបាន 5 គ្រាប់ ដោយឈ្នះពានរង្វាន់ World Cup 2018, ជើងឯករង World Cup 2022 និង UEFA Nations League 2020-21។



ខ្សែការពារ Raphael Varane បានបង្ហោះនៅលើ Instagram របស់គាត់យ៉ាងដូច្នេះថា ៖ "តំណាងឱ្យប្រទេសដ៏អស្ចារ្យរបស់យើងអស់រយៈពេលមួយទសវត្សរ៍គឺជាកិត្តិយសដ៏អស្ចារ្យបំផុតនៃជីវិតរបស់ខ្ញុំ។ ខ្ញុំបានសញ្ជឹងគិតរឿងនេះអស់រយៈពេលជាច្រើនខែហើយសម្រេចចិត្តថាវាជាពេលវេលាត្រឹមត្រូវ សម្រាប់​ខ្ញុំ​ដែល​បាន​ចូល​និវត្តន៍​ពីក្រុមជម្រើសជាតិ  ខ្ញុំ​នឹង​នឹក​គ្រា​ទាំងនេះ​ជាមួយ​អ្នក​ជា​មិន​ខាន ប៉ុន្តែ​ដល់​ពេល​ហើយ​សម្រាប់​អ្នក​ជំនាន់​ថ្មី​ចូល​មក​ជំនួស។​ សូម​អរគុណ”។