ខ្សែ​ប្រយុទ្ធ​វ័យ​៣៨​ឆ្នាំ Cristiano Ronaldo ​របស់ក្លិប Al Nasser ត្រូវ​បាន​គេ​ស្គាល់​ថា​ជាមនុស្សម្នាក់ដែលពូកែក្នុង​ការ​ថែ​ទាំ​សុខភាព​របស់​គាត់  ទាំងនៅក្នុងលក្ខខណ្ឌនៃការធ្វើលំហាត់ប្រាណ និងការបរិភោគ រហូតដល់មានកីឡាករជាច្រើន រួមទាំងអ្នកគាំទ្របាល់ទាត់ជំនាន់ថ្មីព្យាយាមធ្វើតាមគាត់ ។  យ៉ាង​ណា​មិញ លទ្ធផល​ប្រហែល​មិន​ល្អ​ដូច Ronaldo ទេ​ ដោយសារតែកីឡាកររូបនេះបាន អនុវត្តតាមការណែនាំទាំងនេះយ៉ាងតឹងរ៉ឹងអស់រយៈពេលជាយូររហូតដល់រាងកាយសម្របខ្លួនដូចសព្វថ្ងៃនេះ។



ជាក់ស្តែងខ្សែបម្រើវ័យ២២ឆ្នាំ Gabriel Menino របស់ក្លិប Palmeiras   បានបង្ហាញពីរបៀបដែលគាត់បានសាកល្បងធ្វើរបបអាហារតាម Cristiano Ronaldo ដែលធ្វើឱ្យគាត់អស់កម្លាំងនៅលើទីលានប្រកួត។

Gabriel Menino និយាយថា៖  "ទម្ងន់របស់ខ្ញុំគឺស្ថិតនៅក្នុងទម្ងន់ស្តង់ដារ ប៉ុន្តែខ្ញុំចង់ផ្លាស់ប្តូរ ។ ខ្ញុំបាននិយាយទៅកាន់ Mirtes (Stancanelli) ដែលជាអ្នកជំនាញអាហារូបត្ថម្ភរបស់ Palmeiras ហើយបានសុំឱ្យនាងធ្វើរបបអាហារតាម Cristiano Ronaldo ។ របប​អាហារ​គឺ​បែប​នេះ ​​ អាហារ​ពេល​ព្រឹក​គឺ​ស៊ុត និង​អាហារ​បំប៉ន​។ ហើយមុនពេលហាត់ប្រាណវាជា​អាហារ​បំប៉នម្តងទៀត  អាហារ​ថ្ងៃត្រង់​អាច​ត្រី និង​សាឡាដ​​  ហើយបន្ទាប់មកអាហារពេលល្ងាចវាអាចត្រីនិងសាឡាត់ម្តងទៀត។ ហើយ​ពេល​មុន​ចូល​គេង ​ជា​អាហារ​បំប៉ន​​មួយ​មុខ​ទៀត នោះ​ហើយ​ជា​អាហារទាំង​អស់នោះ”។



គាត់បានបន្ថែមទៀតថា ៖ "នៅពេលខ្ញុំចាប់ផ្តើមឡើងកំដៅ វាដូចជាខ្ញុំមិនអាចរត់បានទៀតទេ។ ខ្ញុំ​គិត​ថា​ខ្ញុំ​នឹង​ស្លាប់ត្រឹមរយៈពេល ៥នាទី ​ក្នុង​ការ​ប្រកួត ខ្ញុំ​មិន​អាច​រត់​បាន​ទៀត​ទេ។ ខ្ញុំត្រូវប្តូរចេញ។ អ្នក​អាហារូបត្ថម្ភ​បាន​មើល​ពី​ខាង​លើ ហើយ​ឃើញ​ថា​ខ្ញុំ​មិន​សុខ​ស្រួល​ទេ។ ដូច្នេះ​ហើយ​នាង​បាន​ប្រាប់​អ្នក​គ្រូពេទ្យ​ឲ្យ​ផ្តល់​ជែល និងIsotonic​មក​ឲ្យ​ខ្ញុំ”។