លោក Keisuke Honda ​អតីត​គ្រូ​បង្វឹក​ក្រុម​បាល់ទាត់​ជម្រើស​ជាតិ​កម្ពុជា ទម្លាយអោយដឹងថាមានបំណងចង់​​ដឹក​នាំ​ក្រុម​ជម្រើស​ជាតិ​ជា​ច្រើន​ដែល​ចង់​បាន​​​កៅអី​ជើង​ឯក​បាល់ទាត់​ពិភព​លោក​ឆ្នាំ​២០២៦។

លោក Honda ទើប​តែ​បាន​បញ្ចាប់ដំណែងអ្នកចាត់ការទូទៅ​ពី​ក្រុម​បាល់ទាត់​ជម្រើស​ជាតិ​កម្ពុជា​កាល​ពី​ប៉ុន្មាន​ថ្ងៃ​មុន​នេះ​ទេ បន្ទាប់​ពី​ចប់ភារកិច្ច និង​ដឹក​នាំ​ក្រុម U22 កម្ពុជា​មិន​បាន​ទទួល​ជោគជ័យ​ក្នុង​ព្រឹត្តិការណ៍​កីឡា​ស៊ីហ្គេម លើក​ទី​៣២។ លោក​បាន​ដឹក​នាំ​ក្រុម​ជម្រើស​ជាតិ​កម្ពុជា​រយៈ​ពេល​៥​ឆ្នាំ​ពោល​គឺ​ចាប់​តាំង​ពី​ឆ្នាំ​២០១៨ ហើយ​ពេល​នេះ​ទំនេរ​ដែល​ជា​ឱកាស​ប្រទេស​ផ្សេង​ៗ​ចង់​បាន​លោក​ទៅ​ដឹក​នាំ។ ជា​ពិសេស​នៅ​តំបន់​អាស៊ី​ដែល​មាន​កៅអីច្រើន​​ទៅ​ជុំ​ផ្តាច់​ព្រ័ត្រ​ជើង​ឯក​ពិភព​លោក​នា​ឆ្នាំ​២០២៦។

លោក​​ Honda បាន​ទម្លាយ​ឲ្យ​ដឹង​នៅ​ព្រឹក​ថ្ងៃ​ទី​១៣ ខែ​ឧសភា​នេះ​ថា ៖«ក្នុង​នាម​ជា​គ្រូ​បង្វឹក​ម្នាក់ ខ្ញុំ​ចាប់អារម្មណ៍​ដឹក​នាំ​ប្រទេស​អូម៉ង់ នូវែលសេឡង់ អារ៉ាប់រួម ថៃ និង​ប្រទេស​មួយ​ចំនួន​ទៀត​ដែល​ចង់​​​​ទៅ​​លេង​​ជើង​ឯក​ពិភព​លោក (World Cup) ឆ្នាំ​២០២៦»។