ខ្សែបម្រើស្លាបដ៏មានទេពកោសល្យកីឡាករ Alejandro Garnacho បានរងរបួសកជើងក្នុងការប្រកួតដែលក្រុម Manchester United បានត្រឹមតែស្មើគ្នាក្នុងលទ្ធផល 0-0 ជាមួយ Southampton  នៅក្របខ័ណ្ឌ Premier League កាលពីយប់មិញ ខណះដែរក្រុម Manchester United បានខកខានក្នុងការទទួលបានបីពិន្ទុពីបាតតារាង Premier League ។ 



សម្រាប់ Garnacho មិនស្ថិតនៅក្នុងជម្រើស១១នាក់ដំបូងឡើយ  គាត់បានប្តូរចូលជំនួសកីឡាករ Jadon Sancho នៅនាទីទី 73  ហើយក៏មានបញ្ហារបួសកជើង  នៅពេលដែលគាត់ត្រូវបានប៉ះទង្គិចជាមួយកីឡាករ Kyle Walker-Peters ប៉ុន្តែបន្ទាប់ពីប៉ះទង្គិច Garnacho អាចបន្តលេងបាន។

ទោះជាយ៉ាងណាក៏ដោយ Garnacho ត្រូវបានប្តូរចេញនៅចុងម៉ោងដោយសារតែបញ្ហាកជើង។ រហូត​ដល់​ចប់​ការ​ប្រកួត​មាន​រូបភាព​បង្ហាញ​ថា​គាត់​ពាក់​ឧបករណ៍​ការពារនិងប្រើឈើច្រត់ដើម្បីជួយទ្រទ្រង់ការធ្វើដំណើរ។ បន្ទាប់​ពី​ករណី​នេះ អ្នក​ចាត់​ការ​ក្រុម Manchester United លោក Erik ten Hag បាន​ប្រាប់ MUTV ថា៖  «បាទ គាត់​រង​គ្រោះ​យ៉ាង​ខ្លាំង។ កជើងរបស់គាត់រមួល ខ្ញុំ​មិន​ចង់​ប្រថុយ​ទេ ដូច្នេះ​ខ្ញុំ​បាន​ប្ដូរ​គាត់​ចេញ»។



ទោះបីជាយ៉ាងណាក៏ដោយ មិនទាន់មានការរំពឹងទុកថា តើ Carnacho ត្រូវសម្រាក់រយៈពេលប៉ុន្មានថ្ងៃនោះទេ ដោយសារលទ្ធផលនៃការត្រួតពិនិត្យយ៉ាងម៉ត់ចត់កំពុងរង់ចាំ។ ប៉ុន្តែមកដល់ពេលនេះ កីឡាករវ័យ 18 ឆ្នាំរូបនេះបានបង្ហាញខ្លួនក្នុងលីកចំនួន 15  ប្រកួតសម្រាប់បិសាចក្រហមក្នុងរដូវកាលនេះ និងស៊ុតបញ្ចូលទីបាន 4 គ្រាប់ផងដែរ។