អ្នកវិភាគជើងចាស់ផ្នែកកីឡារបស់ឥណ្ឌូនេស៊ី និងជាអ្នកអត្ថាធិប្បាយបាល់ទាត់ប្រចាំប្រទេសចាប់តាំងពីឆ្នាំ ១៩៩៤ លោក Mohamad Kusnaeni មើលឃើញថាក្រុមជម្រើសជាតិឥណ្ឌូនេស៊ីអាចប្រឈមមុខនឹងចាញ់ក្រុមដែលមានកម្រិតលេងដូចជា ឡាវ និងកម្ពុជា ប្រសិនបើពួកគេមិនបានត្រៀមខ្លួនរួចរាល់សម្រាប់ការប្រកួត AFF Mitsubishi Electric Cup នាចុងឆ្នាំនេះ។


 

ថ្លែងក្នុងកិច្ចសម្ភាសន៏ជាមួយសារព័ត៍មានក្នុងស្រុកលោក Kusnaeni បានលើកឡើងដូច្នេះថា ៖ “ កម្រិតនៃការលេងរបស់ក្រុមទាំងអស់នៅតំបន់អាស៊ានមានការកើនឡើងកាន់តែប្រកៀកគ្នានៅប៉ុន្មានឆ្នាំចុងក្រោយ។ ប្រសិនបើយើងមិនបានត្រៀមខ្លួនល្អទេ យើងនឹងទទួលនូវការបរាជ័យពីក្រុមដែលមានកម្រិតលេងដូចជាឡាវ និងកម្ពុជាក្នុងការប្រកួតចុងឆ្នាំនេះ”។ 

លោក Mohamad Kusnaeni បានសង្កត់ធ្ងន់ថា៖ “ការត្រៀមលក្ខណៈគឺជាគន្លឹះដ៏សំខាន់សម្រាប់ប្រទេសឥណ្ឌូនេស៊ីនៅ AFF Cup ។ សម្រាប់​កីឡាករ​ក្នុង​ស្រុក​ត្រូវ​មាន​ពេល​យូរ​ក្នុង​ការ​ហ្វឹកហាត់​ជាមួយ​គ្នា​ពេល​ទៅលេងឲ្យ​ក្រុម​ជម្រើស​ជាតិ។ សម្រាប់​កីឡាករ​ដែល​លេង​នៅ​បរទេស វា​នឹង​មាន​កម្រិត​ច្រើន​ជាង ព្រោះ​វា​អាស្រ័យ​លើ​ការ​សម្រេច​ចិត្ត​របស់​ក្លឹប​”។

ការលើកឡើងខាងលើលោក Kusnaeni បានបង្ហាញការព្រួយបារម្ភចំពោះការថយចុះនៃសមត្ថភាពរបស់កីឡាករដែលត្រូវកោះហៅចូលក្រុមជម្រើសជាតិ បន្ទាប់ពីលីគកំពូលឥណ្ឌូនេស៊ីត្រូវបានផ្អាករហូតមកទល់បច្ចុប្បន្នចាប់តាំងពីមានឧបទ្ទវហេតុនៅក្នុងកីឡដ្ឋាន Kanjuruhan Stadium កាលពីដើមខែតុលាកន្លងទៅ ។