គ្រូបង្វឹកក្រុមជម្រើសជាតិបារាំង លោក Didier Deschamps ប្រកាសតែងតាំងខ្សែប្រយុទ្ធ Kylian Mbappe របស់ក្លឹប Paris Saint-Germain ជាផ្លូវការជាប្រធានក្រុមថ្មីរបស់ក្រុមជម្រើសជាតិបារាំង កាលពីថ្ងៃអង្គារ ទី២១ ខែមីនា កន្លងទៅ។ កីឡាករវ័យ 24 ឆ្នាំរូបនេះ ត្រូវបានតែងតាំងជាប្រធាបក្រុមជម្រើសជាតិ  ជំនួសអ្នកចាំទី Hugo Lloris របស់ Tottenham ដែលបានសម្រេចចិត្តចូលនិវត្តន៍ពីក្រុមជម្រើសជាតិ។ 
 


លោក Deschamps បានប្រាប់ទូរទស្សន៍ TV1 ថា៖  "Kylian Mbappe គឺជាប្រធានក្រុមថ្មីរបស់ក្រុមជម្រើសជាតិបារាំង ហើយ Antoine Griezmann គឺជាអនុប្រធាន។ ទាំងនៅលើទីលាន និងក្នុងក្រុម គាត់​ជា​ផ្នែក​មួយ​ដ៏​សំខាន់»។



Mbappe លេងបាន 66 ប្រកួតឲ្យក្រុមជម្រើសជាតិបារាំង ស៊ុតបញ្ចូលទីបាន 36 គ្រាប់ ជាកម្លាំងដ៏សំខាន់មួយក្នុងការជួយឲ្យឈ្នះ World Cup 2018 ក៏ដូចជា Griezmann ដែលលេងឱ្យក្រុមជម្រើសជាតិបាន 117 ការប្រកួត ស៊ុតបញ្ចូលទីបាន 42 គ្រាប់ផងដែរ។



សម្រាប់ក្រុមជម្រើសជាតិបារាំង មានការប្រកួតវគ្គជម្រុះ UEFA Euro 2024 ចំនួនពីរ ក្នុងពូល B ដោយចាប់ផ្តើមប្រកួតជាមួយក្រុមម្ចាស់ផ្ទះហូឡង់ នៅថ្ងៃសុក្រ ទី២៤ ខែមីនា មុននឹងប៉ះជាមួយនិងសាធារណរដ្ឋអៀរឡង់ ថ្ងៃច័ន្ទ ទី២៧ ខែមីនា។