លោក Ian Wright ដែលជាអតីតវីរបុរសក្រុមកាំភ្លើងធំ Arsenal ពីឆ្នាំ 1991 ដល់ 1998 មានជំនឿជឿថាអតីតក្លឹបរបស់លោក Arsenal នឹងឈ្នះពាន Premier League ជាលើកដំបូងនៅរដូវកាលនេះ ក្រោយពីខកខានឈ្នះជិត 20 ឆ្នាំមកហើយនោះ។  ខណៈដែល Arsenal ឈ្នះពាន Premier League លើកចុងក្រោយគឺនៅរដូវកាលឆ្នាំ 2003/04។

លោក Ian Wright បានប្រាប់ The Kelly និង Wrighty មុនការប្រកួតស្មើគ្នា 0-0 រវាង Newcastle នឹង Arsenal កាលពីយប់មិញថា៖ "ខ្ញុំតែងតែនិយាយថារីករាយជាមួយពេលវេលាមួយនេះ"។

"យើងដឹងហើយថា Manchester City ល្អប៉ុណ្ណា ពួកគេប្រហែលជាក្រុមតែមួយគត់ ដែលមានកីឡាកររបួសតិចតួចបំផុតចំពោះកីឡាករសំខាន់ៗ ហើយនៅតែអាចឈ្នះពានលីគបាន"។

"ខ្ញុំព្យាករណ៍ថា Arsenal នឹងមានឱកាសឈ្នះពាន Premier League រដូវកាលនេះ ប្រសិនបើជាពួកគេព្យាយាមចុះហត្ថលេខាលើកីឡាករបន្ថែមទៀតនៅក្នុងខែមករានេះ ហើយកីឡាករ Martin Odegaard, Bukayo Saka និង Thomas Partey មិនមានមានបញ្ហារបួសសោះនោះ។  ព្រោះពួកគេទាំងបីនាក់នេះសំខាន់ណាស់សម្រាប់ Arsenal នាពេលបច្ចុប្បន្ននេះ"។

ក្រុមកាំភ្លើងធំ Arsenal ក្រោមការដឹកនាំរបស់លោកគ្រូវ័យក្មេង Mikel Arteta ពិតជាមានភាពលេចធ្លោជាខ្លាំងនៅក្នុងក្របខ័ណ្ឌ Premier League នៅរដូវកាលនេះ។  ក្រោយពីឆ្លងកាត់ការប្រកួតចំនួន 17 ប្រកួតមាន 44 ពិន្ទុឈរកំពូលតារាងនៃក្របខណ្ឌ Premier League ដោយដាច់ពិន្ទុក្រុមលេខ 2 Manchester City ចំនួន 8 ពិន្ទុ។

ខណៈដែលក្រុមគូប្រជែង Arsenal គឺ Manchester City យប់ថ្ងៃព្រហស្បត្ត៍សប្ដាហ៍នេះត្រូវទៅសួរសុខទុក្ខក្រុមម្ចាស់ផ្ទះតោខៀវ Chelsea នៅ Stamford Bridge នាវេលាម៉ោង 3:00 រំលងអាធ្រាត្រ។