អតីតប្រធានក្រុម Manchester United លោក Roy Keane បាននិយាយថា៖ “លោកពិតជាចង់ឃើញ Lionel Messi ឈ្នះពាន World Cup ជាមួយអាហ្សង់ទីនណាស់ ហើយច្បាស់ណាស់ថាអាហ្សង់ទីនហាក់មានប្រៀបជាងបារាំងបន្តិចនៅវគ្គផ្តាច់ព្រ័ត្រនេះ”។  លោកបានបន្ថែមទៀតថា៖ "ខ្ញុំក៏បានត្រៀមខ្លួនរួចជាស្រេច ដើម្បីគាំទ្រក្រុមអាហ្សង់ទីន និង Lionel Messi ដើម្បីលើកពាន World Cup នៅវគ្គផ្តាច់ព្រ័ត្រ 2022 នេះ"។

វីរបុរស Manchester United វ័យ 51 ឆ្នាំរូបនេះបានប្រាប់ ITV Football ថា៖ "គួរឱ្យចាប់អារម្មណ៍ខ្លាំងណាស់ វាគឺជាការប្រកួតវគ្គផ្តាច់ព្រ័ត្រដ៏អស្ចារ្យ ហើយជាការប្រកួតដែលគ្រប់គ្នាទន្ទឹងរង់ចាំ"។ 

ជាមួយគ្នានេះលោក Roy Keane ក៏បានចង្អុលបង្ហាញថា៖ “បារាំងមានចំណុចខ្សោយក្នុងការតំបន់ការពារកណ្តាលរបស់ពួកគេ។  ប៉ុន្តែ​បារាំងមាន​ខ្សែ​ប្រយុទ្ធ​ដ៏​គ្រោះថ្នាក់​ ដែល​អាចបង្កហានិភ័យជាខ្លាំងដល់​អាហ្សង់ទីន​។  ហើយ​អាច​បញ្ជូន​បាល់​បាន​យ៉ាង​ងាយ​តាមរយៈ​ខ្សែ​បម្រើ​ដ៏ល្អរបស់ពួកគេ។  ប៉ុន្តែការប្រកួតនៅថ្ងៃអាទិត្យនេះ វា​នឹង​មាន​អ្វី​ប្លែក។​  បារាំង​ជា​អតីត​ជើងឯក។  ដូច្នេះពួកគេនឹងលេងដោយមានទំនុកចិត្ត។  ពួកគេមានកីឡាករល្អៗជាច្រើនដែលអាចផ្ដល់ផលលំបាកដល់អាហ្សង់ទីន”។ 

ខណៈដែលក្រុមជម្រើសជាតិនៃប្រទេសទាំងពីរសុទ្ធតែធ្លាប់ឈ្នះ World Cup 2 លើកដូចគ្នា ដោយអាហ្សង់ទីនឈ្នះនៅឆ្នាំ 1978 និង 1986 ហើយបារាំងឈ្នះនៅឆ្នាំ 1998 និង 2018 ដូច្នេះរវាងក្រុមទាំងពីរក្រុមណាដែលឈ្នះ World Cup 2022 នេះ នឹងក្លាយជាការឈ្នះលើកទី3 របស់ពួកគេ។