គ្រូបង្វឹកក្រុមជម្រើសជាតិប្រេសុីលលោក Tite បានប្រកាសលាលែងពីតំណែងរបស់ខ្លួនភ្លាមៗ ក្រោយពីក្រុមជម្រើសជាតិប្រេសុីលជ្រុះចេញពីពានរង្វាន់ FIFA World Cup Qatar 2022 ត្រឹមវគ្គ 8 ក្រុមចុងក្រោយក្រោមថ្វីជើងក្រូអាត។

ក្រុមជម្រើសជាតិប្រេសុីល ដែលជាក្រុមមួយក្នុងចំណោមក្រុមខ្លាំងៗ ដែលគេគិតថាអាចនឹងឈ្នះពាន World Cup 2022 នេះនោះ បានរងបរាជ័យនៅវគ្គ 8 ក្រុមចុងក្រោយ ក្រោមថ្វីជើងក្រុមជើងឯករង World Cup 2018 ក្រូអាត។ ខណៈដែលក្រុមជម្រើសជាតិនៃប្រទេសទាំងពីរ បានប្រកួតគ្នាយ៉ាងស្វិតស្វាញបំផុតអស់រយៈពេល 120 នាទីដែលបញ្ចប់ទៅក្នុងលទ្ធផលស្មើគ្នា 1-1 ប៉ុន្តែឈានទៅដល់វគ្គប៉េណាល់ទីកាត់សេចក្ដីប្រេសុីលបានភ្លាត់ចាញ់ក្រូអាតក្នុងលទ្ធផល 4-2។

គ្រូបង្វឹកក្រុមជម្រើសជាតិប្រេសុីលលោក Tite បាននិយាយថា៖ "វត្តមានរបស់ខ្ញុំជាមួយប្រេសុីល​បាន​បញ្ចប់​ហើយ ហើយ​ខ្ញុំ​រក្សា​តាម​ពាក្យ​សន្យារបស់ខ្ញុំ"។ មានអ្នកជំនាញដែលអស្ចារ្យផ្សេងទៀតដែលអាចជំនួសខ្ញុំ។

គួរបញ្ជាក់ថាលោក Tite បានចូលកាន់តំណែងជាគ្រូបង្វឹកក្រុមជម្រើសជាតិប្រេសុីលកាលពីថ្ងៃទី16 ខែមិថុនា ឆ្នាំ 2016។ ខណៈដែលសមិទ្ធផលរបស់លោក Tite ជាមួយប្រេសុីលក្នុងរយៈពេល 6 ឆ្នាំមកនេះ គឺលោកបានជួយអោយប្រេសុីលឈ្នះពានរង្វាន់ Copa América កាលពីឆ្នាំ 2019។

ខណៈដែលប្រេសុីលតាំងតែពីពួកគេបានឈ្នះពាន World Cup លើកចុងក្រោយកាលពីឆ្នាំ 2002 នៅជប៉ុន-កូរ៉េខាងត្បូងនោះមក គឺពួកគេមិនដែលបានឈានទៅកាន់វគ្គផ្ដាច់ព្រ័ត្រពាន World Cup ម្ដងណាទៀតនោះទេ។