សហព័ន្ធកីឡាបាល់ទាត់ប្រេសុីលកំពុងតែពិចារណាតែងតាំងអតីតគ្រូបង្វឹកក្រុមជម្រើសជាតិអេស្ប៉ាញ នឹង FC Barcelona លោក Luis Enrique ជាគ្រូបង្វឹកថ្មីរបសពួកគេ បន្ទាប់គ្រូបង្វឹកចាស់លោក Tite បានប្រកាសលាលែងពីតំណែងភ្លាមៗ ក្រោយប្រេសុីលធ្លាក់ចេញពីពានរង្វាន់ FIFA World Cup Qatar 2022 ត្រឹមវគ្គ 8 ក្រុមចុងក្រោយ ក្រោមថ្វីជើងក្រូអាត។

ប្រធានសហព័ន្ធកីឡាបាល់ទាត់ប្រេស៊ីលលោក Ednaldo Rodrigues គ្រោងនឹងធ្វើដំណើរទៅកាន់ទ្វីបអឺរ៉ុបក្នុងសប្ដាហ៍ក្រោយ ដើម្បីជួបជាមួយបេក្ខភាពគ្រូបង្វឹកនាពេលអនាគតរបស់ប្រសុីល។ 

ខណៈដែលលោក Luis Enrique គឺជាបេក្ខភាពមួយក្នុងចំណោមបេក្ខភាពដែលត្រូវតែងតាំងជាគ្រូបង្វឹកថ្មីរបស់ក្រុមជម្រើសជាតិប្រេសុីល ដែលត្រូវបានជ្រើសរើសដោយ UOL Esporte ដែលជាសារព័ត៌មានក្នុងស្រុកប្រេសុីល។

សហព័ន្ធកីឡាបាល់ទាត់ប្រេសុីល CBF បានសាកសួររួចហើយ អំពីភាពដែលអាចទៅរួចរវាងលោក Enrique នឹងក្រុមជម្រើសជាតិប្រេសុីល តាមរយៈវីរបុរសក្រុមជម្រើសជាតិប្រេសុីលលោក Ronaldo ដែលធ្លាប់ជាអតីតមិត្តរួមក្រុមរបស់លោក Enrique កាលនៅ Barcelona ដែលបានជជែកជាមួយគ្នាផ្ទាល់នៅអេស្ប៉ាញ។

លោក Luis Enrique មិនមែនជាមនុស្សតែម្នាក់គត់ដែលស្ថិតក្នុងបញ្ជីរបស់លោក Ednaldo Rodrigues នោះទេ ខណៈដែលបេក្ខភាពដទៃទៀតក៏មានគ្រូបង្វឹក Real Madrid លោក Carlo Ancelotti ផងដែរ។  បើទោះបីជាគ្រូបង្វឹកសញ្ជាតិអុីតាលីរូបនេះ បានទទូចថារូបលោកមានបំណងចង់គោរពកិច្ចសន្យារយៈពេលវែងរបស់លោកជាមួយ Real Madrid។

គួរបញ្ជាក់ថាលោក Luis Enrique ត្រូវបានបណ្ដេញចេញពីតួនាទីជាគ្រូបង្វឹកក្រុមជម្រើសជាតិអេស្ប៉ាញកាលពីថ្ងៃទី08 ខែធ្នូ ឆ្នាំមុន ក្រោយពីបានដឹកនាំអេស្ប៉ាញធ្លាក់ត្រឹមវគ្គ 16 ក្រុមចុងក្រោយនៃពានរង្វាន់ FIFA World Cup Qatar 2022 ក្រោមថ្វីជើងម៉ារ៉ុក។