ក្រោយពីជួយក្រូអាតឡើងទៅកាន់វគ្គ 8 ក្រុមចុងក្រោយក្នុងពានរង្វាន់ FIFA World Cup Qatar 2022 អ្នកចាំទីក្រុមជម្រើសជាតិក្រូអាតកីឡាករ​ Dominik Livaković បានបង្កើតកំណតត្រាដ៏អស្ចារ្យមួយ។  ដោយអ្នកចាំទីក្រូអាតរូបនេះបានក្លាយជាអ្នកចាំទីទី3 នៅក្នុងប្រវត្តិសាស្ត្រពានរង្វាន់ FIFA World Cup ដែលអាចសង្គ្រោះគ្រាប់បាល់ប៉េណាល់ទីបានរហូតដល់ទៅ 3 លើកក្នុងមួយប្រកួត។

ខណៈដែលក្រុមជម្រើសជាតិក្រូអាតបានទំលាក់ជប៉ុននៅវគ្គកាត់សេចក្ដីបាល់ 11 ម៉ែត្រក្នុងវគ្គ 16 ក្រុមចុងក្រោយក្នុងលទ្ធផល 3-1 កាលពីយប់មិញ។  ហើយក្នុងចំណោម 4 គ្រាប់ដែលជប៉ុនទាត់ប៉េណាល់ទីមកលើក្រូអាតនោះ គឺត្រូវបានអ្នកទីក្រូអាតកីឡាករ Dominik Livaković សង្គ្រោះបាន 3 គ្រាប់ នឹងរបូតតែ 1 គ្រាប់ប៉ុណ្ណោះ។

គួរបញ្ជាក់ថាអ្នកចាំទី 2 រូបផ្សេងទៀតដែលធ្លាប់ធ្វើបានកំណត់ត្រាមួយនេះរួមមាន៖

ដោយអ្នកដែលធ្វើបានដំបូងគេ គឺអតីតអ្នកចាំទីក្រុមជម្រើសជាតិព័រទុយហ្គាល់លោក Ricardo Pereira ធ្លាប់ធ្វើបានកាលពី World Cup ឆ្នាំ 2006 ទល់នឹងអង់គ្លេសក្នុងវគ្គ 8 ក្រុមចុងក្រោយ។

ហើយអ្នកដែលធ្វើបានទី2 គឺអតីតអ្នកចាំទីក្រូអាតកីឡាករ Danijel Subašić ធ្លាប់ធ្វើបានកាលពី World Cup ឆ្នាំ 2018 ទល់នឹងដាណឺម៉ាកក្នុងវគ្គ 16 ក្រុមចុងក្រោយ។

ក្រុមជម្រើសជាតិក្រូអាតនឹងឡើងទៅជួបក្រុមជម្រើសជាតិប្រេសុីលនៅវគ្គ 8 ក្រុមចុងក្រោយ ខណៈដែលការប្រកួតនឹងធ្វើឡើងនៅថ្ងៃទី09 ខែធ្នូ វេលាម៉ោង 10:00 យប់ម៉ោងនៅកម្ពុជាយើង។