ជ័យជំនៈរបស់ក្រុមជម្រើសជាតិជប៉ុនលើក្រុមជម្រើសជាតិអាល្លឺម៉ង់ 2-1 នៅ World Cup ឆ្នាំ2022 កាលពីយប់ម្សិលមិញ កំពុងតែធ្វើអោយមានភាពល្បីល្បាញខ្លាំងក្នុងពិភពបាល់ទាត់។ ហើយវាក៏បានធ្វើអោយពិភពលោកស្គាល់បាល់ទាត់អាសុីកាន់តែច្បាស់ថែមមួយកម្រិតទៀតផងដែរ ក្រោយពីអារ៉ាប៊ីសាអូឌីតបានយកឈ្នះអាហ្សទីន 2-1 នឹងជប៉ុនឈ្នះអាល្លឺម៉ង់ ​2-1 យ៉ាងគួរអោយភ្ញាក់ផ្អើលបំផុតនៅក្នុងព្រឹត្តិការណ៍ World Cup លើកនេះ។

ហើយអ្វីដែលគេចាប់អារម្មណ៍ខ្លាំងបំផុតក្នុងជ័យជំនៈជប៉ុនលើអាល្លឺម៉ង់នោះ គឺខ្សែប្រយុទ្ធជប៉ុនកីឡាករ Takuma Asano ព្រោះមុនពេល Takuma Asano មិនទាន់ប្ដូរចូលលេង អាល្លឺម៉ងស្ទើរតែបត់ពាក់កណ្ដាលតារាងលេងជាមួយជប៉ុនទៅហើយ។ ប៉ុន្តែនៅពេលមានវត្តមាន Takuma Asano នៅលើទីលានបានធ្វើអោយស្ថានភាពរបស់ជប៉ុន ហាក់ប្រែប្រួលស្ទើរតែទាំងស្រុង ដោយជប៉ុនមានសាច់បាល់លេងច្រើន ហើយអ្វីដែលកាន់តែអស្ចារ្យនោះ គឺជប៉ុនអាចវាយបកយកឈ្នះម្ចាស់ពានរង្វាន់ World Cup 4 លើកអាល្លឺម៉ង់ 2-1 វិញយ៉ាងអស្ចារ្យបំផុតតែម្ដង។ ហើយអ្នកដែលរកបានគ្រាប់បាល់ជ័យជំនៈ អោយជប៉ុនលើអាល្លឺម៉ងនេះគឺ Takuma Asano នេះឯង។

បើនិយាយអំពីក្លឹបដែលវីរបុរសបាល់ទាត់ជប៉ុនកីឡាករ Takuma Asano កំពុងតែប្រកបអាជីពបច្ចុប្បន្ននេះគឺក្លឹប VfL Bochum នៅ Bundesliga ដែលជាលីគកំពូលប្រទេសអាល្លឺម៉ង់។ ប៉ុន្តែ Asano ក៏ធ្លាប់ជាអតីតកីឡាកររបស់ក្រុមកាំភ្លើងធំ Arsenal ផងដែលពីមុនមក តែអាជីពបាល់ទាត់របស់គេជាមួយ ​Arsenal គឺមិនទទួលបានជោគជ័យនោះទេ ព្រោះតែ Asano ត្រូវបានបដិសេធលិខិតអនុញ្ញាតការងារនៅប្រទេសអង់គ្លេស។

Asano បានចូលរួមជាមួយ Arsenal នៅក្នុងរដូវក្តៅឆ្នាំ2016 បន្ទាប់ពីបានជួយអោយក្រុម Sanfrecce Hiroshima ឈ្នះជើងឯកលីគកំពូលជប៉ុននៅរដូវកាលឆ្នាំ2015។ ក្រោយមក Arsenal បានដាក់អោយ Asano ទៅក្រុមនៅលីគកំពូលអាល្លឺម៉ង់ខ្ចីជើងបន្តបន្ទាប់រហូតដល់ Arsenal សម្រេចលក់ Asano ដាច់អោយទៅក្រុមនៅរុស្សី FK Partizan ក្នុងទំហំទឹកប្រាក់ 1 លានអឺរ៉ូនៅក្នុងឆ្នាំ2019។

អតីតគ្រូ Arsenal គឺលោកតាបារាំង Arsene Wenger ធ្លាប់បាននិយាយថា៖ Takuma Asano គឺជាខ្សែប្រយុទ្ធវ័យក្មេងដែលមានទេពកោសល្យ និងជាកីឡាករដ៏អស្ចារ្យម្នាក់នៅថ្ងៃអនាគត។ តែក្រោយមកអាជីបបាល់ទាត់របស់ Asano ក៏បានជួបបញ្ហានៅ Arsenal ដោយសារតែរូបគេ ត្រូវបានបដិសេធលិខិតអនុញ្ញាតការងារនៅប្រទេសអង់គ្លេស។ ដែលនេះហើយជាមូលហេតុធ្វើអោយ Asano មិនអាចបង្ហាញខ្លួនអោយ Arsenal បានសូម្បីតែមួយប្រកួតក្នុងរយៈពេល 4 ឆ្នាំក្នុងនាមជាកីឡាកររបស់ Arsenal។