បើយោងតាមប្រព័ន្ធ​ផ្សព្វផ្សាយ​អេស្ប៉ាញ​ Marca បានចុះផ្សាយថា​តារា​ឆ្នើម​សញ្ជាតិ​ព័រទុយហ្គាល់​ Cristiano Ronaldo បានដាក់លក្ខខណ្ឌមួយក្នុងកិច្ចសន្យាជាមួយក្លិបថ្មីរបស់គេ Al-Nassr ក្នុងការដែលអាចលេងឱ្យក្រុម Newcastle United នៃក្របខណ្ឌ Premier League បាន ប្រសិនបើ Newcastle បានលេងនៅក្របខណ្ឌ Champions League នៅរដូវកាលក្រោយ។

ខ្សែប្រយុទ្ធវ័យ 37 ឆ្នាំសញ្ជាតិ​ព័រទុយហ្គាល់​រូបនេះ ទើបតែបានចុះកុងត្រាចូលរួមជាមួយក្លឹបយក្សរបស់ប្រទេសអារ៉ាប៊ីសាអូឌីត Al-Nassr កាលពីថ្ងៃសុក្រ សប្ដាហ៍មុន ដោយទទួលបានប្រាក់ពលកម្ម 173 លានផោនក្នុងមួយឆ្នាំ។

Cristiano Ronaldo ក្រោយពីបានផ្លាស់ទៅកាន់ក្លឹបអារ៉ាប៊ីសាអូឌីតនេះ រូបគេ​ត្រូវ​បាន​អ្នក​គាំទ្រ​បាល់ទាត់​មួយ​ចំនួន​រិះគន់​យ៉ាង​ខ្លាំង ​ថា​មិន​ត្រូវ​នឹង​ពាក្យដែលរូបគេបាននិយាយកាលពី​មុន។  ដែលបាននិយាយថារូបគេនឹងព្យួរស្បែកជើងរបស់គេជាមួយនឹងក្រុមកម្រិតខ្ពស់ ហើយ​ចង់​លេង​ក្នុង​ពានរង្វាន់អឺរ៉ុប​ UCL ​ជា​ប្រចាំ។

យ៉ាង​ណា​មិញ ប្រព័ន្ធ​ផ្សព្វផ្សាយ​ក្នុង​ប្រទេស​អេស្បាញ​ Marca បានចុះផ្សាយ​យ៉ាង​ដូច្នេះថា Ronaldo នៅមិនទាន់បោះបង់ការចង់លេងនៅក្នុងពានរង្វាន់ Champions League នៅឡើយនោះទេ។  ដោយសារតែរូបគេមានលក្ខខណ្ឌពិសេសក្នុងការផ្លាស់ទៅ Newcastle ក្នុងលក្ខខ័ណ្ឌខ្ចីជើង ប្រសិនបើក្រុម Newcastle បានលេងនៅ Champions League នៅរដូវ​កាល​ក្រោយ។

គួរបញ្ជាក់ថា​ Newcastle ក្រោមការដឹកនាំរបស់លោកគ្រូ Eddie Howe បច្ចុប្បន្នកំពុងតែឈរនៅចំណាត់ថ្នាក់លេខ 3 ក្នុងតារាង Premier League។  ខណៈដែល Newcastle ក៏ត្រូវបានគ្រប់គ្រងដោយមូលនិធិវិនិយោគសាធារណៈរបស់ប្រទេសអារ៉ាប៊ីសាអ៊ូឌីត (PIF) ផងដែរ។