ក្រុមជម្រើសជាតិពពកសអាហ្សង់ទីន នឹងត្រូវជួបជាមួយក្រុមជម្រើសជាតិក្រូអាត ក្នុងការប្រកួតវគ្គពាក់កណ្ដាលផ្ដាច់ព្រ័ត្រនៃពានរង្វាន់ FIFA World Cup Qatar 2022 នៅកីឡដ្ឋាន Lusail Iconic នាវេលាម៉ោង ​2:00 នាទីរំលងអាធ្រាត្រយប់នេះ ម៉ោងនៅកម្ពុជាយើង។

បើនិយាយអំពីការជួបគ្នាវិញ ក្រុមជម្រើសជាតិនៃប្រទេសទាំងពីរ ធ្លាប់ជួបគ្នាបានចំនួន 4 លើកមានឈ្នះមានចាញ់ទៅវិញទៅមក ប៉ុន្តែមិនដែលធ្លាប់ស្មើគ្នាទាល់តែសោះ។  ខាងក្រោមនេះជាប្រវត្តិនៃការជួបគ្នា 4 លើកកន្លងមករបស់ក្រុមជម្រើសជាតិនៃប្រទេសទាំងពីរ៖

▪️ អាហ្សង់ទីន 0-3 ក្រូអាត (World Cup 2018)

▪️ អាហ្សង់ទីន 2-​​1 ក្រូអាត (2014 មិត្តភាព)

▪️ អាហ្សង់ទីន 2-3 ក្រូអាត (2006 មិត្តភាព)

▪️ អាហ្សង់ទីន 1-0 ក្រូអាត (World Cup 1998)

ក្រុមជម្រើសជាតិអាហ្សង់ទីនរបស់លោកគ្រូ Lionel Scaloni បានឡើងមកកាន់វគ្គពាក់កណ្តាលផ្តាច់ព្រ័ត្រ World Cup 2022 នេះ ដោយយកឈ្នះហូឡង់ 4-3 ដោយការស៊ុតបាល់ប៉េណាល់ទីកាត់សេចក្ដីក្នុងវគ្គ 1/4 ផ្តាច់ព្រ័ត្រ បន្ទាប់ពីស្មើគ្នា 2-2 ពេញ 120 នាទី។

ការប្រកួតជាមួយក្រូអាតនៅរាត្រីនេះ អាហ្សង់ទីននឹងអវត្តមានកីឡាករសំខាន់ៗពីររូបគឺខ្សែការពារស្លាបស្ដាំកីឡាករ Gonzalo Montiel និងខ្សែការពារស្លាបឆ្វេងកីឡាករ Marcos Acuña ដែលត្រូវជាប់ពិន័យដោយសារជាប់កាតលឿងពីរដង។

ចំណែកខ្សែប្រយុទ្ធស្លាបកីឡាករ Papu Gomez ដែល​មាន​របួស​កជើង​ត្រូវ​បាន​គេ​រំពឹង​ថា​នឹង​មាន​កាយសម្បទា​ទាន់​ពេល​សម្រាប់​ការ​ប្រកួតជាមួយក្រូអាតនេះ ព្រម​ទាំង Angel Di Maria ដែល​ជា​កីឡាករ​បម្រុង​ក្នុង​ការ​ប្រកួត​ជាមួយហូឡង់ ក៏ត្រៀម​លេងជម្រើស 11 នាក់ដំបូងវិញផងដែរ។

ខណៈដែលកីឡាករសំខាន់ៗផ្សេងទៀតរួមមាន Lionel Messi, Julian Alvarez, Emiliano Martinez, Rodrigo de Paul, Christian Romero និង Nicolas Otamendi នៅតែចូលលេងបានជាធម្មតា។

ចំណែកក្រុមជម្រើសជាតិក្រូអាតរបស់លោកគ្រូ Zlatko Dalic វិញ បានឡើងមកកាន់វគ្គពាក់កណ្តាលផ្តាច់ព្រ័ត្រ World Cup 2022 នេះ ដោយយកឈ្នះប្រេសុីល 4-2 ដោយការស៊ុតបាល់ប៉េណាល់ទីកាត់សេចក្ដីក្នុងវគ្គ 1/4 ផ្តាច់ព្រ័ត្រ បន្ទាប់ពីស្មើគ្នា 1-1 ពេញ 120 នាទី។

ហើយការប្រកួតជាមួយអាហ្សង់ទីននៅរាត្រីនេះ ក្រូអាតមិនមានបញ្ហាចំពោះរឿងកីឡាកររបួស ឬជាប់ពិន័យអ្វីនោះឡើយ ពោលគឺពេញជើងតែម្ដង។

ខណៈដែលអាជ្ញាកណ្តាលកាត់សេចក្ដីក្នុងការប្រកួតនេះគឺលោក Daniele Orsato សញ្ជាតិអុីតាលី។