ផ្លូវការ៖ ក្រុម FC Union Berlin នៃក្របខណ្ឌ German Bundesliga បានឈានដល់កិច្ចព្រមព្រៀងចុះកិច្ចសន្យាយកបានតារា World Cup 2022 របស់ក្រុមជម្រើសជាតិក្រូអាតកីឡាករ Josip Juranović ពីក្រុមយក្សស្កុតឡេន Celtic ក្នុងទំហំទឹកប្រាក់ 8.5 លានអឺរ៉ូជាមួយកុងត្រារហូតដល់ឆ្នាំ 2027។

ខ្សែការពារស្លាបស្ដាំវ័យ 27 ឆ្នាំរូបនេះបានដើរតួយ៉ាងសំខាន់ជាមួយក្រុមជម្រើសជាតិក្រូអាតក្នុងពានរង្វាន់ FIFA World Cup Qatar 2022 ដោយបានជួយឲ្យក្រូអាតទទួលបានចំណាត់ថ្នាក់លេខ 3 ជាមួយការបង្ហាញខ្លួន 6 ប្រកួត នឹងរកបាន 1 assists។

ខណៈដែល Juranović បានផ្លាស់មកចូលរួមជាមួយក្រុម Celtic ពីក្រុម​ប៉ូឡូញ Legia Warszawa ក្នុងខែសីហា ឆ្នាំ 2021 ដោយបានបង្ហាញខ្លួនសរុប 53 ប្រកួត រកបាន 6 គ្រាប់ នឹង 3 assists។  ហើយរូបគេក៏បានជួយឲ្យ Celtic ឈ្នះពានរង្វាន់ Scottish Premiership 1 លើក នឹងពាន Scottish league cup 1 លើកផងដែរ។

គួរបញ្ជាក់ថាក្រុម FC Union Berlin នាំយក Josip Juranović នេះទៅដើម្បីជំនួសកន្លែងកីឡាករន័រវែស Julian Ryerson ដែលទើបតែបានចាកចេញទៅចូលរួមជា Borussia Dortmund កាលពីសប្ដាហ៍មុន។

ខណៈដែលបច្ចុប្បន្ននេះក្រុម FC Union Berlin កំពុងតែស្ថិតក្នុងចំណាត់ថ្នាក់លេខ 3 នៃតារាងក្របខណ្ឌ German Bundesliga ដោយខុសត្រូវពិន្ទុគ្នាជាមួយក្រុមកំពូលតារាង FC Bayern Munich ត្រឹមតែ 5 ពិន្ទុប៉ុណ្ណោះ។