ក្រុមបិសាចក្រហម Manchester United ទំនងជាត្រូវខកចិត្តសារជាថ្មីម្ដងទៀត បន្ទាប់ពីអ្នកចាំទីដែលជាគោលដៅចង់បានរបស់ពួក គឺចាំទីជម្រើសជាតិស្វីស Yann Sommer បានឆ្លើយតបថាយល់ព្រមចំពោះការផ្ទេរទៅ Bayern Munich ប៉ុន្តែខាង Bayern Munich មិនទាន់បានដាក់សំណើរទិញជាផ្លូវការនៅឡើយនោះទេ។

Bayern Munich បាន​ឈាន​ដល់​កិច្ច​ព្រម​ព្រៀង​ពាក្យសម្ដី​ផ្ទាល់មាត់​មួយ​ជាមួយ​នឹង​អ្នក​ចាំទី Yann Sommer របស់ក្រុម Borussia Monchengladbach កាល​ពី​ថ្ងៃ​ពុធ ទី​​​4 ខែ​មករា កន្លង​ទៅ។


ខណៈដែល Bayern Munich គឺកំពុងស្វែងរកអ្នកចាំទីថ្មី បន្ទាប់ពីអ្នកចាំទីដៃទី1 របស់ពួកគេកីឡាករ Manuel Neuer បានបាក់ជើងនៅពេលជិះស្គី រហូត​ត្រូវ​សម្រាក​រហូត​ដល់​ចប់​រដូវ​កាល​នេះតែម្ដង។  ដំបូងឡើង Bayern មាន​គម្រោង​ចង់នាំយកអ្នកចាំទីរបស់ពួកគេកីឡាករ Alexander Nübel សញ្ជាតិអាល្លឺម៉ង់ ត្រលប់ពីកិច្ចសន្យាខ្ចីជើងនៅក្រុម AS Monaco ប៉ុន្តែត្រូវបានក្លឹបនៅ Ligue 1 របស់បារាំងមួយនេះបានបដិសេធ។

ដោយសារតែបែបនេះហើយទើប Bayern ងាកទៅរក Yann Sommer ដែលជាគោលដៅរបស់ Manchester United ជំនួសវិញ។  ហើយចុងក្រោយនេះលោក Florian Plettenberg ដែលជាអ្នកយកព័ត៌មានបាល់ទាត់ប្រចាំ Sky Sports បានរាយការណ៍ថា អ្នកចាំទីជម្រើសជាតិស្វីសវ័យ 34 ឆ្នាំរូបនេះ បានឆ្លើយយល់ព្រមក្នុងការផ្លាស់មកចូលរួមជាមួយ Bayern ក្នុងខែមករានេះ។ 

ទោះជាយ៉ាងណាក៏ដោយ មកទល់នឹងពេលនេះ Bayern នៅមិនទាន់បានដាក់សំណើរណាមួយទៅកាន់ក្រុម Borussia Monchengladbach ដើម្បីពិចារណាជាផ្លូវការនៅឡើយនោះទេ។  ខណៈដែលលោក Plettenberg ក៏បានបញ្ជាក់ផងដែលថាអ្នកចាំទី Sommer បានយល់ព្រមលើកិច្ចសន្យាជាមួយ Bayern រហូតដល់ចុងខែមិថុនា ឆ្នាំ 2025។