អតីត​ប្រធាន FIFA លោក Sepp Blatter បាននិយាយរិះគន់ចំៗទៅកាន់​ប្រធាន FIFA បច្ចុប្បន្នលោក Gianni Infantino ថា៖ អ្នកកំពុងតែព្យាយាមរកលុយច្រើនពេកហើយពីការប្រកួតបាល់ទាត់ ហើយមិន​គួរទៅ​លូក​ដៃ​ចូលក្នុង​ការ​ប្រកួត​បាល់ទាត់​នៅ​កម្រិត​ក្លឹប​នោះទេ។

ហើយលោកក៏បានចោទ​ប្រធាន FIFA បច្ចុប្បន្នលោក Gianni Infantino ថា​បាន​ចំណាយ​ប្រាក់​លើស​ពី​ផែនការដែលបានកំណត់​ បន្ទាប់ពីធ្វើការផ្លាស់​ប្តូរ​ទម្រង់​នៃ​ការ​ប្រកួត​ទាំងព្រឹត្តិការណ៍ FIFA World Cup និងពានរង្វាន់ FIFA Club World Cup។
 

គួរបញ្ជាក់ថានៅប៉ុន្មានឆ្នាំមកនេះលោក Infantino ដែលជាប្រធាន FIFA បច្ចុប្បន្នត្រូវបានគេរិះគន់យ៉ាងខ្លាំង ចំពោះការសម្រេចចិត្តគោលនយោបាយមួយចំនួនដែលផ្តោតលើទីផ្សារច្រើនជាងសុខភាពកីឡាករ ឬស្ថានភាពរស់នៅរបស់ក្លឹបនីមួយៗ។

ជាឧទាហរណ៍ ដោយចាប់ពីព្រឹត្តិការណ៍ FIFA World Cup ឆ្នាំ 2026 តទៅ FIFA បានពង្រីកក្រុមចូលរួមពី 32 ទៅ 48 ក្រុមនៅជុំផ្តាច់ព្រ័ត្រ។  ខណៈដែលពានរង្វាន់ FIFA Club World Cup នឹងពង្រីកក្រុមចូលរួមពី 7 ទៅ 32 ក្លឹបជំនួសវិញចាប់ពីឆ្នាំ 2025 តទៅ។

ខណៈដែលលោក Blatter បានបន្ថែមទៀតថា៖ អ្វីដែលកំពុងកើតឡើងនៅពេលនេះ គឺការព្យាយាមរកលុយច្រើនពេកពីការប្រកួតបាល់ទាត់។  វា​ប្រៀបដូចជា​ការ​ព្យាយាម​ច្របាច់ទឹក​ក្រូចឆ្មា ​ចេញ​ពី​ផ្លែក្រូចឆ្មា​ច្រើន​ឡើងៗអញ្ចឹង។