ព្រឹត្តិការណ៍ 4 ឆ្នាំម្ដង FIFA World Cup Qatar 2022 នឹងឈានចូលមកដល់នៅរាត្រីនេះហើយ ខណៈដែលការប្រកួតបើកឆាក គឺម្ចាស់ផ្ទះកាតា ប៉ះអេក្វាឌ័រ ម៉ោង 11:00 យប់។ បើនិយាយអំពីការជួបគ្នាវិញ ក្រុមជម្រើសជាតិនៃប្រទេសទាំងពីរ ហាក់មិនសូវជាបានជួបគ្នាប៉ុន្មាននោះទេ ដោយជួបគ្នាបានត្រឹមមួយលើកអោយគត់ គឺនៅក្នុងឆ្នាំ2018 ដែលពេលនោះកាតាបានយកឈ្នះអេក្វាឌ័រ 4-3 ក្នុងការប្រកួតលក្ខណៈមិត្តភាព។

បើនិយាយអំពីបទពិសោធន៍នៅក្នុងពានរង្វាន់ FIFA World Cup នេះវិញ ច្បាស់ណាស់ថាម្ចាស់ផ្ទះកាតា គឺពិតជាក្រុមដែលក្មេងខ្ចីជាងគេតែម្ដងក្នុងចំណោមក្រុមទាំង 32 នៅជុំផ្ដាច់ព្រ័ត្រនេះ ព្រោះនេះជាលើកដំបូងហើយដែលម្ចាស់ផ្ទះកាតា មានវត្តមាននៅជុំផ្ដាច់ព្រ័ត្រក្នុងពានរង្វាន់ FIFA World Cup។

ចំណែកអេក្វាឌ័រវិញ FIFA World Qatar 2022 នេះជាការបង្ហាញវត្តមានលើកទី4 (2002, 2006, 2014 នឹង 2022) ហើយសម្រាប់ពួកគេ ខណៈដែលអេក្វាឌ័រធ្វើបានសមិទ្ធផលល្អបំផុតនៅក្នុងពានរង្វាន់មួយនេះ គឺការដែលអាចឈានទៅកាន់វគ្គ 16 ក្រុមចុងក្រោយកាលពី World Cup ឆ្នាំ2006 នៅក្នុងប្រទេសអាល្លឺម៉ង់។

ក្រុមជម្រើសជាតិកាតាបច្ចុប្បន្ននេះ ដឹកនាំដោយលោកគ្រូ Félix Sánchez សញ្ជាតិអេស្ប៉ាញ ហើយខាងក្រោមនេះជាបញ្ជីឈ្មោះកីឡាករទាំង 26 រូបចុងក្រោយដែលលោកគ្រូ Félix Sánchez បានធ្វើការកោះហៅត្រៀមការប្រកួត World ​Cup ក្នុងនាមជាប្រទេសម្ចាស់ផ្ទះ ខណៈដែលកីឡាករទាំង 26 រូបនោះសុទ្ធតែប្រកបអាជីពនៅក្នុងស្រុកទាំងអស់តែម្ដង៖

កីឡាករដែលគួរអោយចាប់អារម្មណ៍ជាងគេ នៅក្នុងក្រុមជម្រើសជាតិកាតានៅ World Cup 2022 នេះរួមមាន៖

.ទី1 ខ្សែប្រយុទ្ធកីឡាករ Almoez Ali ដែលបច្ចុប្បន្នកំពុងតែប្រកបអាជីព ជាមួយក្រុមនៅក្នុងប្រទេសកាតាផ្ទាល់តែម្ដងគឺ Al-Duhail SC។

.ទី2 ខ្សែប្រយុទ្ធស្លាបឆ្វេងកីឡាករ Akram Afif ដែលបច្ចុប្បន្នកំពុងតែប្រកបអាជីព ជាមួយក្រុមនៅក្នុងប្រទេសកាតាផ្ទាល់តែម្ដងគឺ Al Sadd SC។

.ទី3 ប្រធានក្រុមកីឡាករ Hassan Al-Haydos ដែលបច្ចុប្បន្នកំពុងតែប្រកបអាជីព ជាមួយក្រុមនៅក្នុងប្រទេសកាតាផ្ទាល់តែម្ដងគឺ Al Sadd SC។

ចំណែកក្រុមជម្រើសជាតិអេក្វាឌ័រវិញ បច្ចុប្បន្ននេះដឹកនាំដោយលោកគ្រូ Gustavo Alfaro សញ្ជាតិអាហ្សង់ទីន ហើយខាងក្រោមនេះជាបញ្ជីឈ្មោះកីឡាករទាំង 26 រូបចុងក្រោយដែលលោកគ្រូ Gustavo Alfaro បានធ្វើការកោះហៅត្រៀមការប្រកួត World ​Cup 2022 នេះ៖

កីឡាករដែលគួរអោយចាប់អារម្មណ៍ជាងគេ នៅក្នុងក្រុមជម្រើសជាតិអេក្វាឌ័រនៅ World Cup 2022 នេះរួមមាន៖

.ទី1 ខ្សែបម្រើវ័យក្មេងកីឡាករ Moisés Caicedo ដែលបច្ចុប្បន្នកំពុងតែប្រកបអាជីពនៅ Premier League ជាមួយក្រុម Brighton & Hove Albion។

.ទី2 ខ្សែប្រយុទ្ធស្លាបកីឡាករ Enner Valencia ដែលបច្ចុប្បន្នកំពុងតែប្រកបអាជីពនៅលីគកំពូលប្រទេសទួរគី ជាមួយក្រុម Fenerbahçe។

.ទី3 ខ្សែការពារស្លាបឆ្វេងកីឡាករ Pervis Estupiñán ដែលបច្ចុប្បន្នកំពុងតែប្រកបអាជីពនៅ Premier League ជាមួយក្រុម Brighton & Hove Albion។